கம்பராமாயணம் – பாலகாண்டம் - நகரப் படலம் Kamba Ramayanam 43

போகம் என்னும் பழம் பழுத்திருந்தது

71
காடு, புனம், கிடங்கு, குளம், சுனை, பந்தல் – மலர்கள் பூத்து வண்டுகள் பாடும்.
72
கள்வர் இல்லாமையால் காவல் இல்லை. கொள்வார் இல்லாமையால் கொடுப்பார் இலை.
73
கல்வி, பொருள் வளத்தில் எல்லாரும் நிறைந்திருந்தனர்.
74
கல்வி முளைத்து, கேள்வி என்னும் வயலில், தவம் தழைத்து, அன்பு அரும்பி, தருமம் மலர்ந்து, போகம் என்னும் பழம் அயோத்தியில் பழுத்திருந்தது.

காடும், புனமும், கடல் அன்ன கிடங்கும், மாதர்
ஆடும் குளனும், அருவிச் சுனைக் குன்றும், உம்பர்
வீடும், விரவும் மணப் பந்தரும், வீணை வண்டும்
பாடும் பொழிலும், மலர்ப் பல்லவப் பள்ளி மன்னோ!          71

தெள் வார் மழையும், திரை ஆழியும் உட்க, நாளும்,
வள் வார் முரசம் அதிர் மா நகர் வாழும் மாக்கள்-
கள்வார் இலாமைப் பொருள் காவலும் இல்லை; யாதும்
கொள்வார் இலாமைக் கொடுப்பார்களும் இல்லை மாதோ.          72

கல்லாது நிற்பார் பிறர் இன்மையின், கல்வி முற்ற
வல்லாரும் இல்லை; அவை வல்லர் அல்லாரும் இல்லை;
எல்லாரும் எல்லாப் பெருஞ் செல்வமும் எய்தலாலே,
இல்லாரும் இல்லை; உடையார்களும் இல்லை மாதோ.               73

ஏகம் முதல் கல்வி முளைத்து எழுந்து, எண் இல் கேள்வி
ஆகும் முதல் திண் பணை போக்கி, அருந் தவத்தின்
சாகம் தழைத்து, அன்பு அரும்பி, தருமம் மலர்ந்து,
போகங் கனி ஒன்று பழுத்தது போலும் அன்றே.      74

கம்பராமாயணம் – 1. பாலகாண்டம் - 3. நகரப் படலம்
கம்பன் இயற்றிய இராமாயணம் கம்பராமாயணம்
தமிழ்ப் பண்பாடு நோக்கில் கம்பன் தமிழ் வளம்